Hartlich Willkamen in Arf,
dat is de gröttste Gemeen in de Landschop Stapelholm. To Arf höört Bargen an de Eider, Scheppern un denn noch Ekel, Arffeld un Grevenhorst.
Dat öllste Gebüüd in’t Dörp is de St. Marien-Magdalenen-Kark – de is in’t 12. Johrhunnert ut Feldsteen buut worrn. Binnen in is en Vitovschipp, wat de Tielener Schippergill mal to’n Dank schenkt hett. In de Merrn vun’t Dörp finnt Se en Buernklock, so as een de in Stapelholm kennt. In fröher Tieden reep de Klock de Inwahners tohoop un see Bescheed, wenn Gefohr weer.
Ik wünsch Se allens Gode hier in Arf. Kiekt Se man mal, wo smuck dat Dörp un allens ümto is. Wi freut uns, wat wi bi uns de Konferenz vun de Plattdüütsche Fründschop maken köönt!
Ehr Börgermeister
Thomas Klömmer
Konferenz vun de Plattdüütsche Fründschop
Siet 1995 gifft dat de Düütsch-Amerikaansche Plattdüütschkonferenz, domals grünnt vun Glenn Sievers. Een Johr üm’t anner is de Konferenz in den Middelwesten vun de USA un in Sleswig-Holsteen. 2012 weer de Veranstaltung op en besünnern Wunsch in Auerk/Oostfreesland. Siet 2013 is de Naam „ASHHS Low German Friendship Conference“. De plattdüütsche Spraak verbinnt de Frünnen in Amerika un Sleswig-Holsteen.
ASHHS (American Schleswig Holstein Heritage Society) sitt in Walcott, Iowa. De Nakamen vun Sleswig-Holsteeners, de utwannert sünd, hebbt sik tosamenslaten.
Aktuelles un düsse Fleger op Hoochdüütsch: www.erfde.de
Empfehlen Sie uns!